एजेन्सी । रणवीर कपुर स्टारर बलिउड फिल्म ‘एनिमल’ले बक्सअफिसमा धमाका मच्चाईरहेको छ । शुक्रबार रिलिज भएको यो फिल्मले चार दिनमा विश्वभर ४ अर्ब २५ करोड भारु कलेक्सन गरेको छ ।

सोमबाार मात्रै यस फिल्मले भारतभर ४४ करोड भारु कमाएको छ । हिन्दी भाषामा ४० करोड भारु र दक्षिण भारतमा ४ करोड भारु कलेक्सन गरेको छ । योसँगै भारतीय बक्स अफिसमा फिल्मले २ अर्ब ४६ करोड २३ लाख भारु कलेक्सन गरेको छ ।

पहिलो सोमबार जवानको रेकर्ड तोड्यो

पहिलो सोमबारमा सोमबार ४० करोड भारु कमाउँदै यस फिल्मले शाहरुख खान अभिनित ‘जवान’ को रेकर्ड ब्रेक गरेको छ । जवानले पहिलो सोमबार ३२ करोड भारु कमाएको थियो । शाहरुख खानको यो फिल्म यो वर्ष सबैभन्दा धेरै कमाउने फिल्म हो । फिल्मको वल्र्डवाइड कलेक्सन ११ अर्ब भारु थियो ।

एनिमलले आइतबार तेस्रो दिन ७५ करोड भारु कमाएर नयाँ रेकर्ड बनाएको थियो । मात्रै ३ दिनमा फिल्मले ३ अर्ब ५६ करोड भारुको कमाइ गरेको थियो । योसँगै फिल्मले विकेन्ड कलेक्सनका हिसाबले यो वर्षको दोस्रो ठूलो फिल्म ‘पठान’ को रेकर्ड तोडेको थियो।

एनिमलले ब्रम्हास्त्रको रेकर्ड तोड्ने र रणवीरको सबैभन्दा ठूलो हिट फिल्म बन्न सक्ने बताइएको छ । रणवीरले आफ्नो १६ वर्षको फिल्मी करियरमा २० फिल्ममा काम गरेका छन् । योमध्ये ११ ओटा फिल्म फ्लप थिए भने ९ ओटा मात्रै हिट छन् ।